Pajisjet ku mund të lexohet libri
Përmbledhja
Letërsia ruse i dha botës Tolstoin dhe Dostojevskin. Ilf dhe Petrov i dhanë Ostap Benderin — njeriun që mund të hyjë në çdo ndërmarrje me duar bosh dhe të dalë prej saj si pronari kryesor.
Një grua në shtratin e vdekjes zbulon se ka fshehur një pasuri në diamante brenda njërës prej dymbëdhjetë karrigeve të sallonit, të cilat komunistët i konfiskuan bashkë me gjithë pasurinë e familjes pas Revolucionit Bolshevik të vitit 1917.
Në kërkim të tyre niset Ipolit Vorobjaninovi, ish-fisnik dhe nëpunës i gjendjes civile. Por gjuetia merr jetë vetëm kur ai bashkohet me Ostap Benderin: aventurier gjenial, mashtrues i lindur dhe mjeshtër i intrigës. Në të njëjtën garë futet edhe atë Fjodori, një prift me besim të patundur te diamantet.
Kërkimi i çon nga provinca në Moskë, nga Vollga në Kaukaz, mes burokratësh oportunistë, poetësh pa talent, spekulantësh dhe mbetjesh të aristokracisë së dikurshme. Thesari vë në lëvizje tregimin; lakmia, hipokrizia, absurdi dhe marrëzia administrative i japin romanit humorin e tij të pavdekshëm.
12 Karriget është një kryevepër e satirës ruse dhe botërore, e përkthyer në të gjitha gjuhët e Ballkanit, në gjuhët e mëdha europiane dhe shumë më gjerë, si dhe e ekranizuar në vende të ndryshme. Lexuesit shqiptar kjo botë i vjen e afërt: burokracinë, parullat, mungesat, oportunizmin dhe mjeshtërinë e mbijetesës i njeh edhe nga historia e vet.
Lexuesi shqiptar e njohu veprën më 1960 përmes përkthimit të Hamit Kokalarit, një botim me vlerën e vet historike. Ky botim i ri niset nga një parim tjetër editorial: është një përkthim dhe përshtatje e re, origjinale dhe e pavarur. Në themel të tij është teksti integral i veprës, i botuar pas rënies së Bashkimit Sovjetik me pjesët e censuruara të rikthyera, ndërsa disa burime të tjera kanë shërbyer për kontroll.
Zgjatjet dhe përsëritjet janë ngjeshur; janë ruajtur historia, personazhet, aventura, grotesku, dialogët më të mprehtë dhe batutat më të mira. Gjithçka është sjellë në një shqipe bashkëkohore, të natyrshme dhe plot ritëm.
Dymbëdhjetë karrige. Një thesar. Dhe Ostap Benderi, i cili nuk ka asnjë kopek, por kërkon përqindjen më të madhe.
Vlerësime
Lini përshtypjen tuaj
Libra të ngjashëm me "DYMBËDHJETË KARRIGET "
Shpërndaje në: